Koronavirusa görə kimlər risk qrupundadır? [AZ]
Koronavirus hər yaşda, hər vəziyyətdə insana təsir edə bilər. Ancaq səhhətində problem olanlarda və müəyyən yaşlı insanlarda yoluxmanın nəticəsi daha ağır olur.
Bəs belə vəziyyətdə insanlar nə etməlidir?
“HaberGlobal” bununla bağlı mütəxəssislərin tövsiyələrini təqdim edib.
Kimlər yüksək risk qrupuna daxildir?
Yaşı 70-dən yuxarı olanlar yüksək risk qrupuna daxildirlər. Bundan başqa yaşları 70-dən aşağı olsa da, xroniki ağciyər xəstəlikləri, xroniki ürək xəstəlikləri, xroniki böyrək xəstəlikləri, hepatit kimi xroniki qaraciyər xəstəlikləri, Parkinson, dağınıq skleroz, serebral iflic kimi xəstəliklər, diabet, dalaq xəstəlikləri, QİÇS kimi xəstəliklərdən əziyyət çəkənlər də ehtiyatlı olmalıdırlar. Bundan başqa dalaq əməliyyatı edənlər, kimyəvi terapiya səbəbindən immuniteti zəifləyənlər, artıq çəkidən əziyyət çəkənlər və hamilə qadınlar risk qrupundadır.
Yaşı 70-dən yuxarı olanlar üçün karantin vacibdirmi?
Mütəxəssislər yaşı 70-dən yuxarı olanların evdə qalmasını, xüsusən də adamların çox olduğu qapalı yerlərə getməkdən çəkinməyi tövsiyə edirlər.
Belə insanlar tək yaşayırlarsa, tanıdıqlarına, yaxud qohumlarına vəziyyəti bildirməli, alış-veriş kimi ehtiyaclar üçün yardım istəməlidirlər. Bundan başqa ailələrə də yaşı 70-dən yuxarı olan tanıdıqlarına mütəmadi zəng edib hal-əhval tutmaları tövsiyə olunur.
Xroniki xəstəlikləri olanlar nə etməlidir?
Yüksək təzyiq, ağciyər xəstəlikləri, zəif immun sistemi kimi problemi olanlara virus yoluxarsa ciddi problemlər yarana bilər. Bu səbəbdən tədbir kimi həmin şəxslər evdə özlərini təcrid etməli, adamların çox olduğu yerlərə getməməli, sosial məsafəyə diqqət etməlidir.
Adi soyuqdəymə olsa belə qətiyyətlə evdə qalmaları və istirahət etmələri tövsiyə olunur. Simptomlar ağırlaşarsa və yeddi gün ərzində özlərini yaxşı hiss etməzlərsə, tibbi müəssisəyə müraciət etməlidir.
Şəkər xəstələri nə etməlidir?
Birinci və ikinci tip diabet xəstələri daha böyük risk altındadırlar. Həkimlərin sözlərinə görə, diabet xəstəliyi olanlar öskürək, yüksək temperatur simptomları ilə yanaşı nəfəs almaqda da çətinlik çəkirlərsə mütəmadi qan şəkəri yoxlanılmalı, yeddi gün evdən bayıra çıxılmamalıdır. Xəstəxanalara, yaxud aptekə getmək olmaz. Vəziyyət yeddi gün ərzində düzəlməzsə, telefonla müvafiq tibbi qurumlara zəng eləmək lazımdır.
Hamilələr qorxmalıdırmı?
Hamilələrin körpələrinin virusa yoluxduğu halı hələ təsbit olunmayıb. Ancaq bununla belə mütəxəssislər hamilələrə diqqətli olmalarını və sosial təması dayandırmaları barədə xəbərdarlıq ediblər.
Siqaret çəkənlər də risk qrupuna daxildir?
Həkimlər ümumiyyətlə siqaretin tərgidilməsinin, ya da ən azı azaldılmasını tövsiyə edirlər. Belə ki, siqaret çəkənlərin nəfəs yolu infeksiyalarına yoluxma ehtimalı digərlərindən iki dəfə artıqdır və asanlıqla sətəlcəm ola bilərlər. Onlar koronavirusa yoluxmadan öncə bu zərərli vərdişdən əl çəkməli və ağciyərdə virusa qarşı immuniteti artırmalıdırlar.
Mənbə: Oxu.az
Saytın məlumatlarından istifadə edərkən link ilə istinad mütləq vacibdir!
